व्हेटरनरी कॉलेजपासून रविनगर चौकाला जोडणारा नवा रस्ता
मनपा आयुक्त डॉ. अभिजीत चौधरी यांनी कामाची पाहणी
Date : 27 Jan 2026
यावेळी मुख्य अभियंता श्री. मनोज तालेवार, उपायुक्त श्री. गणेश राठोड, कार्यकारी अभियंता श्री. मनोज गद्रे, उद्यान संवर्धक श्री. अमोल चौरपगार, उपअभियंता श्री. प्रमोद मोकाडे श्री. नरेंद्र भांडारकर यांच्यासह इतर कर्मचारी उपस्थित होते.
सेमिनरी हिल्स, सीपीडब्ल्यूडी क्वार्टस भागातील नागरिकांना अमरावती मार्ग किंवा रविनगर भागात येण्यासाठी जवळपास अडीच किलोमीटरचा वळसा घालून यावे लागत आहे. विकास आराखड्यानुसार (डीपी) नवा मार्ग व्हेटरनरी महाविद्यालयाच्या समोरून निघणार असून, तो सेमिनरी हिल्स मार्गाला जोडला जाणार आहे. रस्त्याच्या बांधकामावर २२ कोटी रुपये खर्च होणार आहे. तेथून तो रस्ता थेट रविनगर चौकात जाणाऱ्या रस्त्याला जोडला जाणार आहे. यामुळे सेमिनरी हिल्स, सीपीडब्ल्यूडी क्वार्टर्स, सुरेंद्रगड व गिट्टीखदान या भागातील नागरिकांना अमरावती मार्गावर येणारे अधिक सोयीचे होणार आहे.
या रस्त्यासाठी नागपूर महानगरपालिकेने माफ्सू व झुडपी जंगलाची जमीन ताब्यात घेतली आहे. यासाठी आवश्यक मंजुरी राज्य सरकारने मनपाला दिल्या आहेत. यामुळे हा रस्ता होण्यातील सर्व अडचणी दूर झाल्या आहेत. सर्व शासकीय मंजुरी मिळाल्यामुळे या कामाला गती द्यावी व त्वरित काम पूर्ण करावे, असे निर्देश आयुक्तांनी यावेळी अधिकारी व कंत्राटदारांना दिले.
