मनपाची आर्थिक स्थिती मजबूत करण्यासाठी कर वसुली वाढवा - सभापती सरीता कावरे यांचे प्रशासनाला आवाहन
Date : 17 Mar 2026
कर आकारणी व कर संकलन विशेष समितीची आढावा बैठक मनपा मुख्यालयातील डॉ. पंजाबराव देशमुख स्मृती स्थायी समिती सभागृहात सभापती श्रीमती सरिता कावरे व उपसभापती श्री. सुनील हिरणवार यांच्या उपस्थितीत पार पडली. यावेळी समितीचे सदस्य श्री. रमेश भंडारी, श्रीमती सरस्वती सलामे, श्री. मनोज कुमार गावंडे, श्रीमती रेखा पाटील, उपायुक्त श्री. मिलिंद मेश्राम, उपायुक्त तथा सहायक आयुक्त श्री. गणेश राठोड, श्री. अशोक गराटे, सहायक आयुक्त श्री. धनंजय जाधव, श्री. विजय थूल, श्री. नरेंद्र बावनकर, श्री. राजकुमार मेश्राम, श्री. प्रमोद वानखेडे, श्री. विकास रयबोले, श्री. हरीश राऊत आणि मुख्यालयातील कर अधीक्षक श्री. जितेंद्रसिंग तोमर यांच्यासह मनपाचे इतर अधिकारी व कर्मचारी उपस्थित होते.
बैठकीत कर विभागाचे उपायुक्त श्री. मिलिंद मेश्राम यांनी मालमत्ता धारकांवरील कर आकारणी, नामबदल (म्युटेशन), कर वसुली, पोस्टल ॲड्रेस, वॉरंट, हुकूमनामा, जप्ती, जाहीरनामा, इतर शहरांशी नागपूरच्या मालमत्ता कराची तुलना, विभागातील अधिकारी-कर्मचाऱ्यांची संख्या, झोननुसार कर वसुली, ऑनलाईन व ऑफलाईन कर भरणा, अभय योजना आणि शासकीय मालमत्तांवरील कर यांबाबत सादरीकरण केले. तसेच आर्थिक वर्ष 2025-26 साठी असलेल्या 325 कोटींच्या वसुली उद्दिष्टापैकी आतापर्यंत 213 कोटी रुपयांची वसुली झाल्याची माहिती दिली.
यावेळी सभापती श्रीमती सरिता कावरे यांनी सांगितले की, नागपूर शहराचा विकास होत असताना महानगरपालिकेची आर्थिक स्थिती अधिक मजबूत करण्यासाठी कर विभागाने जास्तीत जास्त वसुली करावी. 31 मार्चपर्यंत दिलेले उद्दिष्ट 100 टक्के पूर्ण करण्याचे निर्देशही त्यांनी दिले. तसेच कर विभागात मनुष्यबळ वाढवण्यासाठी महापौरांकडे नोकरभरतीचा प्रस्ताव पाठवण्यात येईल, असेही त्यांनी नमूद केले. उपसभापती श्री. सुनील हिरणवार यांनी ज्या भागात कर वसुली कमी आहे, तिथे स्थानिक नगरसेवकांची मदत घेऊन वसुली वाढवण्याच्या सूचना सहायक आयुक्तांना केल्या.
