NMC News

पर्यावरण संवर्धन पंधरवड्यानिमित्त नागपूर महानगरपालिकेच्या वतीने शहरात 5 ते 21 जून या कालावधीत 'विशेष स्वच्छता अभियान' राबविण्यात येत आहे. या अभियानाचा एक भाग म्हणून उद्या शनिवार दि. 6 जून रोजी सकाळी 7 वाजे पासून शहरातील विविध विधानसभा क्षेत्रांतील प्रमुख तलावांच्या स्वच्छतेची मोठी मोहीम हाती घेण्यात आली आहे. जलस्रोतांचे संवर्धन करणे आणि तलावांचा परिसर स्वच्छ व सुंदर बनवणे हा या मोहिमेचा मुख्य उद्देश आहे.

दक्षिण पश्चिम विधानसभा क्षेत्रातील अंबाझरी तलाव येथे सकाळी 7.00 वाजता होणाऱ्या कार्यक्रमात मा. महापौर श्रीमती निता ठाकरे, उपमहापौर श्रीमती लिला हाथीबेड, स्थायी समितीच्या सभापती श्रीमती शिवानी दाणी-वखरे, सत्तापक्ष नेते श्री. नरेंद्र (बाल्या) बोरकर, यांच्यासह झोन सभापती, प्रभागातील सर्वपक्षीय नगरसेवक व मान्यवरांच्या उपस्थितीमध्ये या तलावांची विशेष स्वच्छता मोहीम राबविण्यात येणार आहे. तलावांची विशेष स्वच्छता या विशेष अभियानांतर्गत नागपुरमधील वेगवेगळ्या भागांतील तलावांची स्वच्छता करण्यात येणार आहे. यामध्ये दक्षिण पश्चिम विधानसभा क्षेत्रातील सोनेगाव आणि अंबाझरी तलाव, तर पश्चिम विधानसभा क्षेत्रातील पांढराबोडी आणि पोलीस लाईन टाकळी, तसेच दक्षिण नागपूरमधील सक्करदरा तलाव, मध्य नागपूरमधील नाईक तलाव व गांधीसागर तलाव आणि उत्तर नागपूरमधील बिनाकी मंगळवारी तलावाची स्वच्छता करण्यात येणार आहे. करीता शहरातील पर्यावरणप्रेमी नागरीकांनी तलाव स्वच्छता मोहिमेत सहभागी होवून मोलाचे योगदान दयावे असे आवाहन महापौर श्रीमती निता ठाकरे यांनी केले.