मनपा व लोककल्याण समिती सुपोषण जनजागृती मोहिम राबविणार
महापौरांच्या अध्यक्षतेखाली झालेल्या बैठकीत निर्णय
Date : 07 Sep 2026
यासंदर्भात महापौर श्रीमती निता ठाकरे यांच्या अध्यक्षतेखाली महापौर कक्षात बैठक पार पडली. यात जनजागृती करण्याच्या संदर्भात विविध उपक्रम राबविण्याचा निर्णय घेण्यात आला. यावेळी सत्ता पक्षनेता श्री. नरेंद्र (बाल्या) बोरकर, आरोग्य समितीच्या सभापती श्रीमती मनीषा अतकरे, आरोग्य समितीचे उपसभापती श्री. श्रीकांत आगलावे, परिवहन समितीचे उपसभापती श्री. सुधीर (बंडू) राऊत, रा. स्व. संघाच्या लोक कल्याण समितीचे अध्यक्ष डॉ. दिलीप गुप्ता, सचिव श्री. माधव उराडे, डॉ. हर्षद दासरे, डॉ. प्रसाद वरकडकर, श्रीमती सविता जोशी, श्री. जयंत जोशी, माजी उपमहापौर श्री संदीप जाधव वैद्यकीय आरोग्य अधिकारी डॉ. दीपक सेलोकर व श्री. प्रफुल जोशी उपस्थित होते.
राष्ट्रीय सेवा भारतीच्यावतीने दरवर्षी सप्टेंबर महिना सुपोषण महिना म्हणून साजरा केला जातो. या निमित्ताने नागरिकांमध्ये पोषण, आरोग्य व संतुलित आहाराबाबत जनजागृती करणे, हा या उपक्रमाचा मुख्य उद्देश आहे. या अंतर्गत मनपाच्या शाळांमध्ये तसेच आशा वर्करच्या माध्यमातून लोकांमध्ये जनजागृती करण्यात येणार आहे. त्याचप्रमाणे आपली बसवर या मोहिमेबद्दल बॅनर लावण्यात येईल. तसेच शहराच्या प्रमुख चौकांमध्ये फलक लावण्याचे निर्देश महापौर श्रीमती निता ठाकरे यांनी दिले.
