NMC News

नागपूर महानगरपालिकेच्या समाज विकास विभागाद्वारे दीनदयाळ अंत्योदय योजना – राष्ट्रीय नागरी उपजीविका अभियान अंतर्गत दिवाळी सणानिमित्त महिला बचत गटांनी तयार केलेल्या वस्तूंचे प्रदर्शन व विक्री करण्यासाठी विशेष 'विक्री रथ' उपक्रम राबविण्यात येत आहे. सोमवार ३ नोव्हेंबर ते ६ नोव्हेंबर दरम्यान महिला बचत गटांनी तयार केलेल्या विविध वस्तू आता थेट नागपूरकरांच्या दारी उपलब्ध होणार आहेत. उपक्रमाचे उद्घाटन मंगळवार ३ नोव्हेंबर महापौर श्रीमती निता ठाकरे यांच्या हस्ते सिव्हिल लाईन्स स्थित मनपा मुख्यालयातील सकाळी ११ वाजता करण्यात येणार आहे.

याप्रसंगी यावेळी उप महापौर श्रीमती लिला हाथीबेड, स्थायी समिती सभापती श्रीमती शिवणी दाणी वखरे, सत्तापक्ष नेते श्री. नरेंद्र (बाल्या) बोरकर, मनपा आयुक्त डॉ. विपिन, अतिरिक्त आयुक्त श्री. अंकित, श्री. मुरुगनंथम एम., श्री. मिलिंद मेश्राम, महिला व बालकल्याण विशेष समिती सभापती श्रीमती सारिका नांदुरकर, उपायुक्त डॉ. रंजना लाडे यांच्या सह इतर अधिकारी व कर्मचारी उपस्थित राहणार आहेत
मनपाच्या सर्व दहाही झोनमध्ये हे विक्री रथ फिरणार असून, सकाळी १० ते रात्री ८ वाजेपर्यंत नागरिकांना खरेदीची संधी उपलब्ध असणार आहे. महिला बचत गटांच्या उत्पादनांना बाजारपेठ उपलब्ध करून देणे, त्यांच्या आर्थिक स्वावलंबनाला चालना देणे आणि स्थानिक उद्योजक महिलांच्या कौशल्याला प्रोत्साहन देणे हा या उपक्रमाचा मुख्य उद्देश असून, या दिवाळीत स्थानिक खरेदीचा संकल्प करून महिला बचत गटांच्या कर्तृत्वाला साथ द्यावी तसेच स्वावलंबी नागपूर घडविण्यास हातभार लावावा, असे आवाहन महापौर श्रीमती निता ठाकरे यांनी केले आहे.